சூரிய கிரகணம் சற்று எச்சரிக்கையாக இருக்க வேண்டியவர்கள்.

சூரிய கிரகணம் - 10-06-2021

பிலவ வருடம் வைகாசி மாதம் 27ஆம் தேதி (10-06-2021) வியாழக்கிழமை ஒரு கங்கண சூரிய கிரகணம் ஏற்படுகிறது. இதுபற்றி யூடியூப்பில் ஜோதிடர்கள் பதிவிட்ட சில காணொளிகளை பார்க்க நேர்ந்தது.அதில் ஒரு காணொளியில் காலை 8-11 மணிக்கு தொடங்கி பகல் 1-12 மணி வரை கிரகணம் நடைபெறும் என்று சொல்லப்பட்டது. மற்றொரு காணொளியில் பகல் 1-42 முதல் மாலை 6-41 வரை கிரகணம் நடைபெறும் என்றும் சில நக்ஷத்திர, ராசியினருக்கு பாதிப்பு எனவும் சொன்னார்கள்.இப்படி பலரும் பலவிதமாக குழப்புவதால், சரியான தகவலை உங்களுக்கு தருவதற்காகவே இந்தப் பதிவு.

இந்த சூரிய கிரகணமானது 23-38 வடக்கு அக்ஷாம்சம், 44-00 மேற்கு ரேகாம்சம் அமைந்துள்ள இடத்தில் பிற்பகல் இந்திய நேரப்படி 01:42:19 மணிக்கு ஆரம்பம். கிரகண முடிவு மாலை 06:40:54 மணிக்கு 41-26 வடக்கு அக்ஷாம்சம்,94-20 கிழக்கு ரேகாம்சம் உள்ள பகுதியில் முடிவடைகிறது. இதில் எந்த இடத்திலும் இந்திய பகுதிக்குள் வரவில்லை. எனவே, இந்த கிரகணம் இந்தியாவில் எந்த பகுதியிலும் எள்ளளவு கூட தெரியாது.

ஒரு கிரகணமானது எந்த ஊரில் தெரியாதோ அந்த ஊருக்கு கிரகண தோஷம் கிடையாது. அந்த ஊரில் வசிக்கும் யாருக்கும், எந்த நக்ஷத்திரக் காரர்களுக்கும், எந்த ராசிக்காரர்களுக்கும் கிரகண தோஷமோ பாதிப்போ கிடையாது. உதாரணமாக, ஒரு கிரகணம் சென்னையில் தெரியும் என்றும், செங்கல்பட்டில் தெரியாது என்றும் வைத்துக்கொள்வோம். அப்போது சென்னையில் உள்ளவர்களுக்கு கிரகண தோஷம் உண்டு. அங்கு வசிப்பவர்கள் கிரகண தர்ப்பணம் செய்ய வேண்டும். மேலும், கிரகணம் சம்பவித்த நக்ஷத்திரம், அதன் திரிகோண நக்ஷத்திரம், கிரகணம் சம்பவித்த நக்ஷத்திரத்திற்கு முன் பின் நக்ஷத்திரம் ஆகியவற்றை ஜென்ம நக்ஷத்திரமாக கொண்டவர்கள் கிரகண சாந்தி செய்துகொள்ள வேண்டும். ஆனால் செங்கல்பட்டில் கிரகணம் தெரியாததால், அங்கு வசிப்பவர்களுக்கு கிரகண தோஷம் கிடையாது. அவர்கள் எந்த நக்ஷத்திரத்தில் பிறந்தவர்களாயினும் அவர்களுக்கு எந்த தோஷமோ பாதிப்போ கிடையாது. அதுமட்டுமல்ல, அங்கு வசிக்கும் யாரும் கிரகண தர்ப்பணம் செய்ய வேண்டியதில்லை.

அதுபோலவே, இந்த கிரகணம் இந்தியாவில் தெரியாத காரணத்தால், இங்கு உள்ள யாருக்கும் கிரகண தோஷமோ பாதிப்போ கிடையாது. கிரகண தர்ப்பணமும் செய்ய வேண்டியதில்லை. யாராவது முகநூலிலோ யூடியூப்பிலோ ஏன் தொலைக்காட்சியிலோ கூட இந்த கிரகணத்தால் இன்னின்ன நக்ஷத்திரத்தில் பிறந்தவர்களுக்கு பாதிக்கும், இன்னின்ன ராசியில் பிறந்தவர்களுக்கு பாதிக்கும் என்று சொன்னால் அதை நம்பாதீர்கள். இன்னும் ஒருபடி மேலே சென்று சிலர் இந்த கிரகணத்தால் நமது நாட்டிற்கு பாதிப்பு வரும் என்று கூட சொல்வார்கள். அதையும் நம்ப வேண்டாம்.

இந்தியாவில் தெரியாத இந்த கிரகணத்தால், இங்குள்ள யாருக்கும், எந்த நக்ஷத்திரத்தில் பிறந்திருந்தாலும், எந்த ராசியில் பிறந்திருந்தாலும் பாதிப்பில்லை; ஆண்களுக்கோ பெண்களுக்கோ பாதிப்பில்லை; வாலிபர்களுக்கும் பாதிப்பில்லை; வயதானவர்களுக்கும் பாதிப்பில்லை; கன்னிப்பெண்களுக்கும் பாதிப்பில்லை; கர்ப்பிணி பெண்களுக்கும் பாதிப்பில்லை. கர்ப்பிணிகள் தாராளமாக வெளியில் வரலாம். எப்போதும் போல் இயல்பாக எல்லோரும் அவரவர் பணிகளை செய்யலாம்.

ஜூன் 10 அன்று சூரிய கிரகணம் கிடையாது.

🌹🦚🙏🏻MPK🙏🏻🦚🌹